فيه أحسن كتير...
هوا أنا تعاملت معاهم حوالى 4 شهور لتوفير جليسة لمريضة مسنة. هما طبعًا أغلى من المكاتب التانية اللى بتقدم نفس الخدمة بشكل ملحوظ جدًا. فى الأوقات اللى كانت بتعتذر فيها أى جليسة إنها مش حتقدر تيجى أو مش حتقدر تكمل ما كانوش بيعرفوا يوفروا بديل فورى وكان ممكن الموضوع ياخد منهم يومين أو تلاتة عقبال ما يعرفوا يوفروا حد بديل.
هما فى الأول قالوا لى إنهم حيكتبوا عقد ما بينى وبينهم عشان يوضحوا نطاق الخدمات اللى ممكن يقدموها لى بموجب التعاقد بس دا ما تمش خالص. هما بس ادونى إيصال بقيمة مقدم التعاقد اللى دفعته لهم.
بيعملوا مجموعة على الواتساب وبيخلوا الجليسة تكتب كل التحديثات وكل الأنشطة اللى بتعملها للمريضة أولًا بأول ودى حاجة كويسة فى المتابعة وبتسهل على أهل المريض متابعة حالته.
فيه حاجة كمان اتكررت من تقريبًا كل الجليسات اللى هما كانوا بيعتوهم ليا، وهيا إن الجليسات كانوا بيشتكوا من إن المكتب بيأخر عليهم حساب الجلسات جامد وأحيانًا بيبقى عنده دايمًا جزء من حسابهم يديه لهم فى المستقبل. دى حاجة طبعًا مش بتضرنى كعميل للمكتب نفسه بس كانت بتخلينى مستغرب لما الشكوى اتكررت من أكتر من حد.
فيه حاجة كمان إنى ساعات كتير لما كنت بكلمهم على الواتساب ما بيردوش إلا بعديها بكام يوم، بس لما كان بييجى وقت الحساب على الجلسات كانوا بيبقوا نشيطين جدًا.
